Redaktordan

Əziz Oxucu!

İnsan şəxsiyyətinin formalaşmasında ona yardımçı olan mühüm amillər mövcuddur. Ailə tərbiyəsi, təhsil, ətraf mühit, faydalı hobbilər və s. Kitab oxumaq və mütəmadi olaraq mütaliə ilə məşğul olmaq da şübhəsiz ki, insanı zehni və mənəvi cəhətdən inkişaf etdirən mühüm amillərdəndir. Dinimizin ilk əmri də məhz “oxu”dur. İnsan daima oxumalı, özünü inkişafdan geri durmamalıdır. Bu gün təəssüflər olsun ki, cəmiyyətimizdə oxuma səviyyəsi əvvəlki illərdən çox-çox geridədir. Xüsusilə internet aludəçiliyinin bizi oxumaqdan soyutduğu günümüzdə məhz bu nüansı bir daha xatırlatmaq istədik. Bu sayımızda kitabların dəyərindən bəhs edərək oxumağın əhəmiyyətini göz önünə gətirdik.

“Kitab ömrü” başlıqlı giriş hekayədə kitablarla insanlar arasındakı bənzərlikdən söz açaraq insanı və kainatı anlamağın yolunun kitablardan keçdiyini oxuyacaqsınız. “İnsanlığın yaddaşı”nı oxuduqca dünyanın qədim kitabxanaları haqda qısa məlumat alacaqsınız. İslam alimlərinin kitab sevdasını eyniadlı məqalədə oxuyacaqsınız. “Kitab verilən ümmətin halı” bu gün oxuma səviyyəmizi test edərək əslində oxumaqdan nə qədər soyuduğumuzu, bu itkidən bir an əvvəl xilas olmamızın zərurətindən bəhs edir. “Kitabların söhbəti”, “Ağlımdan kitab keçir”, “Yazının tarixi” və bu kimi bir-birindən maraqlı yazıların hər biri kitab və mütaliə mövzusunda qələmə alınmış məqalələrdir. Tez-tez verilən bir sual var “Kitab oxuma vərdişini necə qazana bilərik?”. Məhz eyniadlı araşdırma yazımızda bu sualınıza cavab tapa bilərsiniz. Bu sayımızı hazırlayarkən əcdadımızın bizə mirası sayılan qədim əlyazmalarımızın qorunub saxlandığı “Əlyazmalar İnstitutu”nun direktoru Teymur Kərimli ilə görüşüb onun da dəyərli fikirlərini almaq qərarına gəldik. Nəticədə gözəl bir müsahibə ərsəyə gəldi, onu da siz dəyərli oxucularla paylaşırıq. Möhtərəm könül insanı Osman Nuri Topbaşın qələmindən könüllərinizə xitab edən “Haqq dostlarından hikmətlər” silsiləsi bu ay da Yunus Əmrə həzrətləri ilə davam edir. O Allah dostundan hikmətləri oxuduqca sizi yeni üfüqlərə aparacağından əminik.  

Sözü uzatmadan sizi “İrfan”la baş-başa qoyuruq.