Redaktordan

Əziz Oxucu!

Hər gün televiziya kanallarında, o cümlədən xəbər saytlarında, qəzet və jurnallarda dünyanı bürüyən cinayət halları ilə qarşılaşırıq. İçkili və narkotik maddə qəbul etmiş şəxslərin özlərinə, ailələrinə və ətraflarındakılara verdikləri zərərləri ürək ağrısı ilə oxuyuruq. Qumarın səbəb olduğu sosial və iqtisadi problemlərlə yanaşı, siqaretin sağlamlığa olan ziyanlarını görüb məyusluq hissi keçiririk. Bir də son dövrlərin dəb xəstəliyinə çevrilən internet və şəbəkə oyunları xəstəliyini bu siyahıya artıranda boşa gedən zamana, tarıma çəkilən əsəblərə və insanların bir-birindən təcrid olunaraq həyat sürməsinə kədərlə sükut edirik.

Dünyamızın əmin-amanlıq içində olması üçün hər bir insan ətrafında gördüyü neqativ halları dəyişməyə çalışmalıdır. “İrfan” jurnalı olaraq bu sayımızı zərərli vərdişlərlə mübarizəyə həsr etmək qərarına gəldik. Hər şeydən əvvəl işə “Necə xilas ola bilərik?” sualı ilə başlamağın vacibliyini giriş məqaləmizdə oxuyacaqsınız. Hər bir müsəlmanın gördüyü pis əməlləri düzəltməsinin vacibliyini “Şərə qıfıl ol!” adlı yazıda oxuyacaqsınız. “İçkinin fəsadları”nı bir daha oxuyaraq yada salmalı və ondan nə qədər uzaq durmalı olduğumuzu xatırlamalıyıq. Qumarın fəsadları, virtual asılılığın zərərləri haqda “Qumar nədir?”, “İstifadə et, asılı olma!”,  adlı məqalələrdən oxuyacaqsınız. Yazarlarımız bu sayımızda bir-birindən maraqlı yazılarla “Müasir gənclik” üçün “Hər şeyin həddi var” dedilər. Mövzumuzla əlaqəli olaraq ta 100 il bundan əvvəl Türkiyədə qurulan, zərərli vərdişlərə qarşı mübarizə təşkilatı olan “Yeşilay”ın sədr müavini, psixoloq Mehmet Dinçlə görüşüb söhbət etdik. İnternet asılılığının fəsadları və övladlarımız üzərindəki mənfi təsirlərini ətraflı şəkildə müzakirə edərək sizin üçün gözəl bir müsahibə hazırladıq. Könül insanı Osman Nuri Topbaşın qələmindən çıxan “Haqq dostlarından hikmətlər” silsiləsi bu ay da Yunus Əmrə həzrətləri ilə davam edir. Əminik ki, oxuduqca önünüzdə yeni üfüqlər açılacaq. Bir sözlə, bizi oxuyun, bizimlə qalın, isti yay günlərinizi “İrfan” oxuyaraq səmərəli hala gətirin!